Kryetari i Komunës së Çairit, Izet Mexhiti, ka pritur në takim ambasadorin e Polonisë në Maqedoninë e Veriut, Mariusz Brymora, i cili vizitoi komunën pas vendosjes së një pllake përkujtimore kushtuar urbanistit dhe arkitektit polak Adolf Ciborowski. Gjatë takimit, Mexhiti dhe ambasadori Brymora kanë diskutuar për rolin e Ciborowskit në rindërtimin e Shkupit pas tërmetit të vitit 1963, me theks të veçantë te angazhimi i tij për ruajtjen e Çarshisë së Vjetër, si një nga pjesët më të rëndësishme të identitetit urban dhe kulturor të qytetit. "Gjatë takimit biseduam për kontributin e rëndësishëm të Ciborowskit në rindërtimin e Shkupit pas tërmetit të vitit 1963, veçanërisht për angazhimin e tij në ruajtjen e Çarshisë së Vjetër si pjesë e identitetit urban dhe kulturor të qytetit", ka shkruar Mexhiti. Ai e vlerësoi takimin si një mundësi për të riafirmuar miqësinë mes Maqedonisë së Veriut dhe Polonisë, duke theksuar se respekti për figurat që kanë dhënë kontribut në historinë e përbashkët krijon ura të reja bashkëpunimi për të ardhmen. Mexhiti e falënderoi ambasadorin Brymora për vizitën dhe për mbështetjen e vazhdueshme në forcimin e marrëdhënieve mes dy vendeve.