Organizata e Veteranëve të Luftës së UÇK-së ka reaguar kundër çdo përpjekjeje për hapjen e çështjeve të reja në Hagë që lidhen me Ushtrinë Çlirimtare Kombëtare, duke i cilësuar ato si përpjekje për shtrembërimin e historisë dhe cenimin e vlerave të luftës çlirimtare. Në reagimin e saj, OVL-UÇK shprehet se bëhet fjalë për, siç thotë, “manovra të revizionizmit politik”, të cilat synojnë “ta shpallin kriminale një luftë të drejtë çlirimtare dhe të minojnë themelet e Marrëveshjes së Ohrit”. “Luftëtarët shqiptarë paguan çmimin që siguroi dinjitet, barazi dhe stabilitet”, thuhet më tej në reagim. Deklarata vjen pas qëndrimit të kreut të BDI-së, Ali Ahmeti, i cili tha se ka informacione për iniciativa në Gjykatën Kushtetuese që lidhen me çështjet e Tribunalit të Hagës dhe me mundësinë e paditjes së Ushtrisë Çlirimtare Kombëtare. OVL-UÇK ka bërë të ditur se kundërshton çdo proces të ri që, sipas saj, do të cenonte të kaluarën dhe vlerat që lidhen me konfliktin e vitit 2001 dhe Marrëveshjen Kornizë të Ohrit.