Eric Wendt është një hap më pranë postit të ambasadorit të Shteteve të Bashkuara në Shqipëri, pasi kandidatura e tij është miratuar nga Komiteti për Marrëdhëniet me Jashtë të Senatit amerikan. Megjithatë, dokumentet zyrtare të Senatit tregojnë se emërimi i tij ende pret votimin në seancë plenare dhe, për rrjedhojë, nuk mund të konsiderohet ende i konfirmuar nga Senati i plotë. Wendt, gjeneral amerikan në pension, ka shërbyer për më shumë se 34 vite në ushtrinë amerikane. Karriera e tij përfshin angazhime të shumta në operacionet speciale, ndërsa ka mbajtur edhe poste të rëndësishme në kuadër të strukturave amerikane dhe të NATO-s. Gjatë dëgjesës në Senat më 20 maj, Wendt deklaroi se nëse merr detyrën në Tiranë, ndër prioritetet e tij do të jenë forcimi i marrëdhënieve SHBA-Shqipëri, lufta kundër korrupsionit dhe krimit të organizuar, siguria kibernetike dhe nxitja e investimeve amerikane. Ai shprehu gjithashtu mbështetje për SPAK-un, duke e cilësuar institucion të rëndësishëm në përpjekjet kundër korrupsionit dhe duke theksuar nevojën për ruajtjen e pavarësisë së tij nga ndikimi politik. Kandidatura e Wendt u miratua nga Komiteti për Marrëdhëniet me Jashtë më 4 qershor, me 19 vota pro dhe 3 kundër. Hapi i radhës është shqyrtimi dhe votimi nga Senati i plotë, pas të cilit, në rast konfirmimi, do të mund të nisë procedura për marrjen zyrtare të detyrës në Tiranë.