Për rreth 20 orë, zjarrfikësit e Patosit kanë qëndruar në terren duke u përballur me flakët dhe temperaturat e larta, në përpjekje për të vënë nën kontroll situatën dhe për të mbrojtur banorët dhe pronat e tyre. Pas orëve të gjata të punës, një moment i shkurtër pushimi ka sjellë një pamje që përcjell më shumë se fjalët. Zjarrfikësit shihen duke marrë energji me një vakt të thjeshtë, bukë dhe djathë, përpara se të rikthehen sërish në terren. “Bukë e djathë e shumë zemër”, është përshkrimi që i shoqëron këto pamje, duke vënë në pah përkushtimin e njerëzve që vijojnë punën edhe në kushtet më të vështira. Puna e tyre gjatë këtyre orëve ka qenë një përpjekje e vazhdueshme për mbrojtjen e komunitetit, ndërsa pamjet nga terreni rikthejnë në vëmendje edhe nevojën për mbështetje, pajisje dhe vlerësim të vazhdueshëm për shërbimet zjarrfikëse.