Ish-presidentja e Kosovës, Vjosa Osmani, ka vizituar Kooperativën “Krusha” në Krushë, ku u takua me gratë që prej vitesh e kanë kthyer punën dhe përkushtimin në një histori suksesi, jo vetëm për komunitetin e tyre, por edhe përtej Kosovës. “Bashkë me kolegë, para disa ditësh vizituam Kooperativën ‘Krusha’, aty ku gratë e Krushës dhe të fshatrave përreth dëshmojnë çdo ditë se si punohet me nder dhe si ecet përpara, duke u bërë shembull brenda dhe jashtë Kosovës”, ka shkruar Osmani. Ajo e vlerësoi punën e grave të kooperativës si një dëshmi të fuqisë së njerëzve që, përmes punës dhe këmbënguljes, ndërtojnë mundësi të reja dhe japin shpresë për të ardhmen. “Vendi ynë ka njerëz të jashtëzakonshëm, të cilët na japin shpresë dhe motiv për ditë shumë më të mira për Republikën e Kosovës”, u shpreh Osmani. Kooperativa “Krusha”, e lidhur ngushtë me emrin e Fahrije Hotit, është prej vitesh një shembull i fuqizimit ekonomik të grave dhe i zhvillimit të një sipërmarrjeje të ngritur nga gratë e Krushës. Osmani e ka vlerësuar edhe më herët Hotin dhe kooperativën si “sinonim të ngadhënjimit dhe suksesit”.