Qeveria hungareze do të ndryshojë një ligj të vitit 2020 që në fakt ua ndalonte çifteve të të njëjtit seks të birësonin fëmijë, njoftoi të shtunën kryeministri Péter Magyar. Ligji kontrovers u miratua nga ish-qeveria e Viktor Orbán, raporton Reuters.

Në Hungari, një vend anëtar i Bashkimit Evropian, çiftet e të njëjtit seks mund të birësonin fëmijë deri në fund të vitit 2020, me kusht që njëri nga partnerët të aplikonte si person i vetëm. Sipas ligjit të miratuar në atë kohë nga partia Fidesz e Orbán, beqarët duhej të merrnin miratim të posaçëm nga ministri për çështjet familjare për të birësuar, gjë që në praktikë përbënte një ndalim të plotë.

Drejtimi i ri i qeverisë hungareze
Péter Magyar mori pushtetin nga Orbán pas një fitoreje dërrmuese zgjedhore në prill, duke i dhënë fund sundimit të tij 16-vjeçar. Ndryshimi në sistemin e birësimit është një hap i rëndësishëm drejt rivendosjes së të drejtave LGBTQ në Hungari.

Në një konferencë për shtyp, Magyar shpjegoi vendimin. “Mund të themi pa mëdyshje se po e ndryshojmë këtë sistem. Raste të tilla nuk duhet të vendosen nga një ministër apo një politikan, por nga ekspertë që mund të vlerësojnë se në çfarë kushtesh një fëmijë mund të arrijë një jetë që do t’i lejojë atij të bëhet një anëtar i lumtur dhe i ekuilibruar i shoqërisë”, tha Magyar.

Ish-kryeministri Orbán, i cili e paraqiti veten si mbrojtës të vlerave të krishtera, miratoi një sërë ligjesh që shkelnin të drejtat e komunitetit LGBTQ. Mundësia e ndryshimit ligjor të gjinisë në dokumentet personale u hoq dhe materialet shkollore që konsideroheshin se promovonin homoseksualitetin ose ndryshimin e gjinisë u ndaluan. Politika të tilla patën pasoja të rënda për komunitetin LGBTQ+.

Në prill, pak para zgjedhjeve, Gjykata Evropiane e Drejtësisë vendosi që qeveria e Orbán kishte shkelur ligjin evropian. Gjykata zbuloi se rregulloret që ndalonin ose kufizonin aksesin në përmbajtjen LGBTQ stigmatizonin dhe margjinalizonin personat homoseksualë dhe transgjinorë. Hungaria nuk e ka legalizuar kurrë martesën e personave të të njëjtit seks, por ajo ende njeh institucionin e partneriteteve civile.