Një situatë e pazakontë i ka ndodhur aktores Meryem Uzerli, e njohur në mbarë botën për rolin e Sulltaneshës Hyrrem në “Sulejmani i Madhërishëm”, gjatë qëndrimit të saj në një hotel në Ortaköy të Turqisë.

Teksa ndodhej në dhomën e saj, aktorja dëgjoi zëra dhe tinguj që vinin nga ambienti ngjitur. Në fillim nuk i kushtoi shumë rëndësi, por shumë shpejt kuptoi se nga dhoma tjetër po ndiqej pikërisht seriali që i ndryshoi karrierën.

Uzerli ndezi kamerën e telefonit dhe regjistroi momentin me humor, ndërsa tregoi se po dëgjonte “Sulejmani i Madhërishëm” nga dhoma pranë.

Por aktorja nuk u mjaftua vetëm me videon.

Pas pak, ajo vendosi të trokiste në derën e dhomës. Kur dera u hap, Uzerli u prezantua dhe u tregoi personave brenda se kishte dëgjuar se po shihnin serialin.

Reagimi i tyre ishte i menjëhershëm: ata mbetën të befasuar kur kuptuan se përballë tyre ndodhej vetë Meryem Uzerli, aktorja që kishte interpretuar personazhin e Hyrremit.

Aktorja e filmoi edhe këtë takim të papritur dhe më pas e publikoi në rrjetet sociale, duke e kthyer një moment krejt të zakonshëm në hotel në një përballje të rrallë mes personazhit televiziv dhe fansave të tij.

Për Uzerlin, “Sulejmani i Madhërishëm” mbetet një prej roleve më të rëndësishme të karrierës së saj, ndërsa historia e Hyrremit vazhdon të ndiqet nga fansa edhe shumë vite pas përfundimit të serialit.