Ish ministri i Punëve të Jashtme, Bujar Osmani, ka reaguar pas djegjes së Kolegjit të Europës në Tiranë, duke thënë se është dhënë shumë punë për ta sjellë atë në rajonin e Ballkanit.

Osmani, thotë se nuk dëshiron të ndërhyjë në punët e brendshme politike dhe se qytetarët kanë të drejtë të protestojnë, por se ka arritje që i takojnë gjithë vendit, përtej cdo qeverie e partie.

“E di sa shumë jemi angazhuar për ta sjellë Kolegjin e Europës në rajonin tonë. Edhe ne e kemi dashur në Shkup. E dinim se çfarë peshe kishte. Me ardhjen e tij, perspektiva europiane merrte një adresë konkrete.

Pas Bryzhit dhe Natolinit, kjo adresë u bë Tirana. Ishte një njohje e madhe për Shqipërinë dhe krenari për të gjithë ne. Të rinj nga vende të ndryshme të Europës do të vinin në Tiranë për të mësuar e për t’u përgatitur për të ardhmen e përbashkët europiane.Prandaj, pamjet e zjarrit dhe dëmtimit të ambienteve të Kolegjit më dhembën. E di sa vështirë fitohet një besim i tillë dhe sa shumë punë duhet që një vend të arrijë deri aty.

Nuk dua të hyj në përplasjet e brendshme politike të Shqipërisë. Qytetarët kanë të drejtë të protestojnë dhe të kërkojnë përgjegjësi nga pushteti. Por ka arritje që i takojnë gjithë vendit, përtej çdo qeverie e partie.

Kolegji i Europës është një prej tyre. Ta godasësh atë do të thotë të godasësh edhe një simbol të së ardhmes europiane të Shqipërisë.Qeveritë vijnë e shkojnë. Ajo që ndërtojmë për brezat që vijnë duhet të mbetet”, ka shkruar Osmani.