Gjermania do të ashpërsojë kriteret për kalimin e testit të gjuhës gjermane për emigrantët.
Kandidatët që synojnë nivelin B1 do të duhet të dëshmojnë njohuri në të gjitha pjesët e testit, ndërsa në pjesën më të dobët do të kërkohet së paku niveli A2.
Ky vendim ka ardhur pasi po synohet të parandalohen mashtrimet gjatë provimeve dhe për të garantuar vlerësimin e mirëfilltë të njohurive gjuhësore. Madje, në disa raste, kandidatët dyshohet se kanë siguruar në mënyrë të paligjshme në internet pyetjet dhe zgjidhjet e testit.
Sipas raportimit të mediumit gjerman RTL, ndryshimet në rregulloren për testet e kurseve të integrimit do të hyjnë në fuqi më 1 nëntor 2026, transmeton Telegrafi.
Me rregullat e reja, kandidatët që synojnë të arrijnë nivelin B1 duhet të dëshmojnë nivelin B1 në pjesën e të folurit (Sprechen) dhe në të paktën njërën nga dy pjesët e tjera: dëgjim dhe lexim (Hören/Lesen) ose shkrim (Schreiben). Në pjesën tjetër të këtyre dy kategorive duhet të arrijnë së paku nivelin A2.
Kjo do të thotë se kandidatët nuk do të mund ta kalojnë testin në nivelin B1 duke u mbështetur vetëm në rezultate të larta në disa pjesë, ndërsa një pjesë tjetër ta lënë pa përfunduar ose të mos dëshmojnë njohuri të mjaftueshme.
Sipas dokumenteve paraprake të përmendura në raportim, zgjidhjet e siguruara në këtë mënyrë janë përdorur kryesisht në pjesën e dëgjimit dhe leximit, ndërsa pjesa e shkrimit është lënë e paplotësuar. Kështu, sipas rregullave të mëparshme, disa kandidatë mund ta arrinin nivelin B1 përmes rezultateve në pjesët e tjera të provimit.
Ndryshimet e reja synojnë të sigurojnë që kandidatët të dëshmojnë njohuri reale në të gjitha pjesët e testit dhe që asnjëra prej tyre të mos anashkalohet.
Sipas të dhënave të Zyrës Federale për Migracionin dhe Refugjatët në Gjermani (BAMF), gjatë vitit 2025 testin e gjuhës gjermane për emigrantët e kanë zhvilluar 318 mijë e 550 persona.
Prej tyre, 175 mijë e 193 kandidatë arritën nivelin B1, ndërsa 102 mijë e 663 persona arritën nivelin A2. Ndërkaq, 40 mijë e 694 kandidatë nuk arritën nivelin A2.
Testi DTZ zhvillohet zakonisht në përfundim të kurseve të integrimit dhe shërben për të vlerësuar njohuritë e gjuhës gjermane të personave që jetojnë në Gjermani. Rezultatet mund të jenë të rëndësishme për procedura të caktuara të qëndrimit dhe integrimit në vend.
