Presidenti amerikan, Donald Trump, ka deklaruar sërish se përfundimi i luftës në Ukrainë është afër, duke pretenduar se palët janë më pranë paqes se kurrë më parë.

Trump i bëri këto deklarata teksa komentoi lirimin nga Rusia të Steven Hubbardit, një mësues në pension, i cili ishte arrestuar pasi kishte luftuar në anën e Ukrainës.

Sipas presidentit amerikan, lirimi i Hubbardit erdhi pas një bisede që ai zhvilloi me presidentin rus, Vladimir Putin, lidhur me përfundimin e luftës. Trump pretendoi se Rusia nuk kishte dhënë asgjë në këmbim të këtij zhvillimi.

“Unë thashë, ‘A mund ta lironi Stephen Hubbard?’ … dhe tani ai është duke u kthyer”, tha Trump gjatë një diskutimi në tryezë të rrumbullakët në Shtëpinë e Bardhë, ku u trajtua çështja e krimit kibernetik.

Ndërkohë, edhe Yuri Ushakov, një bashkëpunëtor i afërt i presidentit rus, Vladimir Putin, ka shprehur vlerësimin se lufta në Ukrainë po i afrohet fundit.

“Konflikti ukrainas po i afrohet fundit”, tha Ushakov.

“Nuk e di sa afër jemi, por gjërat po lëvizin në atë drejtim”, u shpreh ai, duke iu përgjigjur një pyetjeje lidhur me perspektivat për përfundimin e konfliktit.

Ushakov bëri të ditur gjithashtu se Rusia është e gatshme të rifillojë bisedimet trepalëshe me Shtetet e Bashkuara të Amerikës dhe Ukrainën në mesin e nëntorit. Sipas tij, negociatat ka të ngjarë të zhvillohen në Abu Dhabi.