Zbatimi zyrtar i "portofolit elektronik" fillon të enjten, që do të thotë se qytetarët do të kenë në celular kartën e identitetit dhe patentën e shoferit.

Aplikacioni do të lançohet zyrtarisht të mërkurën, më 28 tetor, ndërsa ministri i Transformimit Digjital, Stefan Andonovski thotë se është një aplikacion i sigurt që ofron mundësi për mbrojtjen e të dhënave personale.

"Përdoruesit nuk do të duhet të zbulojnë të gjitha të dhënat e tyre, siç bëjmë tani kur tregojmë kartat plastike të identitetit ose patentat e shoferit. Për shembull, kur dëshironi të identifikoheni në një bankë, bar apo vend tjetër, nuk do të duhet të tregoni të gjitha të dhënat nga karta juaj e identitetit.

Do të jeni në gjendje të zgjidhni vetë se cilat të dhëna dëshironi të ndani, në një mënyrë të sigurt. Të dhënat do të ndahen nëpërmjet një kodi QR, i cili gjenerohet për përdorim një herë. Kodi skanohet dhe personi tjetër i merr të dhënat vetëm nëse e lejoni. Pas 10 deri në 15 sekondash, kodi QR skadon dhe nuk mund të përdoret përsëri. Ne i kemi kushtuar shumë vëmendje sigurisë", tha Andonovski.

Ai theksoi se ky është fillimi i një procesi që duhet të na çojë në portofolin digjital evropian, që do të thotë digjitalizim i plotë i dokumenteve.

"Ky është një fillim i shkëlqyer sepse të dhënat bazë nga karta e identitetit dhe patenta e shoferit do të jenë në dispozicion të qytetarëve. Shpresoj që paralelisht me zhvillimin e portofolit celular, do të shtojmë edhe shërbime, mundësi dhe dokumente të reja për qytetarët", tha Andonovski para fillimit të diskutimit në panel "Parakushtet dhe sfidat për digjitalizimin e përshpejtuar të sektorit privat".