Më shumë se 150 punëtorë të një spitali në Houston dhanë dorëheqje ose u shkarkuan të martën, pasi refuzuan që ta zbatojnë kërkesën për vaksinim kundër Covid-19.

Një zëdhënës i spitalit “Houston Methodist Baytown” tha se në mesin e 200 punëtorëve që iu kërkua marrja e vaksinës deri më 7 qershor ose përballen me pezullim dyjavor, 153 dhanë dorëheqje ose u shkarkuan.

Largimi masiv i punëtorëve erdhi pasi një gjykatës e refuzoi padinë e paraqitur nga një punëtor rreth kërkesës për vaksinim, shkruan Daily Mail, transmeton Gazeta Express.

Rasti për atë se sa larg mund të shkojnë institucionet e kujdesit shëndetësor për t’i mbrojtur pacientët dhe të tjerët nga koronavirusi ka marrë vëmendje të madhe. Besohet se ky është rasti i parë i këtij lloji në ShBA, por nuk pritet që këtu të jetë fundi i botës.

Gjykatësi u tha punëtorëve që u ankuan se nëse nuk iu pëlqen kërkesa për vaksinim, ata mund të shkojnë dhe të punojnë në ndonjë vend tjetër.

Sidoqoftë, paraqitësja e ankesës, infermierja Jennifer Bridges, u zotua se do ta dërgojë rastin deri në Gjykatën Supreme, nëse është e nevojshme. “Ky është vetëm fillimi. Ne do të luftojmë për goxha një kohë”, tha ajo.