Një ngjarje e rëndë me armë zjarri është regjistruar të dielën në fshatin Balldre të Lezhës, ku një automjet tip “Audi” është qëlluar gjatë lëvizjes, duke shkaktuar vdekjen e dy personave.

Sipas të dhënave paraprake, viktima kanë mbetur shtetasi K. M. dhe bashkëshortja e tij G. M., të cilët udhëtonin me automjetin që u sulmua në rrugën Balldren–Torrovicë. Dyshohet se autorët janë larguar nga vendngjarja në drejtim të Shkodrës pas atentatit.

Në vendngjarje kanë mbërritur menjëherë forcat e policisë dhe grupi hetimor, i cili, nën drejtimin e Prokurorisë, po punon për mbledhjen e provave dhe identifikimin e autorëve të krimit. Autoritetet kanë konfirmuar se po vijojnë kontrollet në zonë dhe hetimet janë në fazë intensive.

Ngjarja ka marrë vëmendje të veçantë për shkak të së kaluarës penale të një prej viktimave, i cili ishte përmendur më herët në një proces gjyqësor të lidhur me një vrasje të ndodhur në vitin 2016, çështje e cila kishte kaluar edhe në shkallët më të larta të drejtësisë.