Pas debateve dhe akuzave të fundit nga ambasadori amerikan në Tiranë për një marrëveshje të dyshuar të fshehtë për ta minuar reformën në drejtësi, presidenti Ilir Meta ka paralajmëruar se do të ketë një qasje të ndryshme në takimet me liderët e partive politike dhe përfaqësuesit ndërkombëtarë.

Sipas tij, që nga sot, detyrën e tij zyrtare do ta kryej vetëm përmes takimeve institucionale me cilin do lider politik ose përfaqësues ndërkombëtar.

“Do të shihni një president tjetër. Do të keni një president shumë zyrtar. Në çdo kohë për marrëdhënie institucionale zyrtare, të dokumentuar mirë dhe me dëshmitarë. Me Ramën, me Bashën, me Sorecën dhe me Kimin, me këto katër marrëdhënie institucionale dhe takime, me dëshmitarë dhe të dokumentuara mirë”, tha Meta i ftuar në një emision televiziv.

Ndër të tjera u përqendrua edhe në një nga çështjet më të aktuale në vend, prishjen e Teatrit Kombëtar, pas së cilës, siç tha ai, “ka shumë interesa të fshehura”.

Ai shtoi se e gjithë kjo ishte “në interes të lobit pro-serb dhe pro-rus në Uashington” për të shkaktuar destabilizim në Shqipëri, ndërsa theksoi se ka prova dhe dokumente që do t’i botojë në kohën e duhur.

“U rrëzua për ta provokuar opozitën, për ta destabilizuar situatën, sepse kështu është në interes të dikujt, lobit pro-serb në Uashington, i cili është i interesuar të ketë gjakderdhje. Lobet serbe dhe pro-ruse në Uashington janë të interesuar për grindje civile dhe destabilizim në Shqipëri. Kam shumë prova dhe dokumente që do t’i botoj në kohën e duhur. Do të flas në të ardhmen dhe në kohën e duhur”, tha Meta.