Pas daljes nga formati i njohur televiziv Big Brother VIP Albania, reperi Gjesti ka nisur turin e tij muzikor në të gjitha trevat shqiptare, duke tërhequr vëmendjen e fansave kudo ku ka performuar. Por një moment i pazakontë gjatë një koncerti të mbajtur mbrëmjen e djeshme në Linz të Austrisë ka krijuar tension në skenë dhe ka shqetësuar publikun e pranishëm.

Teksa atmosfera ishte në kulmin e saj, DJ-i personal i Gjestit, i njohur me emrin Gimbo, vendosi në sfond këngën "U Halite" – një projekt i reperit që ai nuk e ka interpretuar asnjëherë live deri më tani. Ky veprim i papritur duket se e surprizoi negativisht Gjestin, i cili reagoi me nervozizëm në skenë, ndërsa fansat nuk mundën të mos e vërenin ndryshimin e menjëhershëm në qëndrimin e tij.

Burime pranë stafit të artistit bëjnë me dije se kënga në fjalë është një material i ndjeshëm për Gjestin, dhe për arsye ende të paqarta, ai ka zgjedhur ta mbajë jashtë repertorit të tij live. Nuk dihet nëse ky veprim i DJ Gimbo ishte një gabim teknik apo një lëvizje e qëllimshme, por ngjarja ka shkaktuar mjaft reagime në rrjete sociale dhe diskutime mes fansave.

Ndërkohë, Gjesti nuk ka dhënë ende një reagim zyrtar për situatën, por pritet që ai të rikthehet në skenë me koncertet e radhës, ndërsa vëmendja është e madhe për të parë nëse kjo ngjarje do të ndikojë në bashkëpunimin e tij me DJ-në aktual./Almakpress