Zëvendëskryeministri i parë dhe njëherësh kreu i Lëvizjes Demokratike, Izet Mexhiti, ka reaguar ndaj kritikave të ish-partnerëve të koalicionit VLEN dhe Qeverisë, përfshirë edhe Arben Taravarin, lidhur me mosrealizimin e projekteve infrastrukturore, siç është rruga Tetovë–Prizren.

Mexhiti ka vlerësuar se këta ish-partnerë nuk kanë të drejtë morale të flasin për projekte të parealizuara, pasi, sipas tij, veprimet e tyre kanë treguar se prioritet nuk ka qenë interesi i qytetarëve apo anëtarësisë së tyre.

“Mendoj që nuk kanë të drejtë morale ata të flasin për realizim projektesh, për realizim rrugësh. Ndërsa më vjen keq që këta nuk e patën prioritet interesin e anëtarësisë së vet,” deklaroi Mexhiti.

Ai ka qenë i ashpër në tonin e tij, duke akuzuar Taravarin se, ndonëse kishte mbushur gojën me rrugën “Arbën Xhaferi”, në fund përfundoi në “rrugën e Ali Ahmetit”.

“Gojën plot në rrugën Arbën Xhaferi dhe përfunduan në rrugën e Ali Ahmetit. Pra, ju qoftë përhajr,” u shpreh Mexhiti.

Kryetari i Lëvizjes Demokratike tha se pavarësisht zhvillimeve të fundit, Koalicioni VLEN mbetet një bllok i fortë politik, i përkushtuar në realizimin e projekteve konkrete për qytetarët.

“Ne vazhdojmë si bllok i fuqishëm si VLEN, të përkushtuar në realizimin e projekteve. Edhe vet puna do të flasë për dallimin dhe ndryshimin ndërmjet neve dhe atyre,” përfundoi Mexhiti./Almakpress