Në një periudhë trevjeçare, nga viti 2020 deri në 2023, 457 persona kanë humbur jetën në aksidente trafiku në vend, ndërsa janë regjistruar gjithsej 31,176 aksidente rrugore. Ky është përfundimi shqetësues i analizës së fundit të Entit Shtetëror të Revizionit (ESHR), i cili thekson se masat për rritjen e sigurisë në trafik nuk po japin rezultatet e pritura.

Sipas revizionit, shkaku kryesor i kësaj situate është zbatimi i ngadaltë dhe joefikas i aktiviteteve të parashikuara në dy strategjitë nacionale për sigurinë në trafik. Kjo vonesë ka sjellë përdorim joefikas të mjeteve financiare, zgjatje të afateve, kosto shtesë për shtetin dhe, më e rëndësishmja, dështim në uljen e numrit të aksidenteve dhe viktimave.

“Zbatimi i dobët i masave e pamundëson arritjen e efekteve të pritura për rritjen e sigurisë rrugore”, thuhet në raportin e ESHR.

Revizorët kanë vënë në dukje gjithashtu se projektet për rehabilitimin e rrugëve kombëtare dhe rajonale nuk janë realizuar siç ishte planifikuar, ndonëse fondet janë shpenzuar. Sistemi “Qytet i Sigurt”, që mund të ndihmonte në dokumentimin e shkeljeve dhe gjobitjen e kundërvajtësve, mbetet i pa shfrytëzuar – megjithëse funksional.

Ndërkohë, nga viti 2019 deri në 2023 janë shpenzuar 37 milionë denarë nga buxheti shtetëror për fushata që synojnë përmirësimin e gjendjes së rrugëve. Vetëm në vitin 2020, Qeveria bleu softuer dhe pajisje në vlerë prej 7.3 milionë denarësh – por as këto nuk kanë sjellë rezultate konkrete në terren.

Ekspertët e angazhuar për analizën paralajmërojnë për një nivel të lartë rreziku në rrugët e analizuara, ku sinjalistika horizontale dhe vertikale është e papërshtatshme, ndërsa mirëmbajtja është e dobët – faktorë që mund të kontribuojnë direkt në aksidente me pasoja tragjike.

Në fund të raportit, ESHR jep një sërë rekomandimesh, ku ndër më të rëndësishmet është nevoja për vendosjen e një sistemi efektiv për monitorimin dhe vlerësimin e ndikimit të masave të marra nga institucionet përkatëse./Almakpress