Koalicioni opozitar shqiptar në Maqedoninë e Veriut, VLEN, ka reaguar ashpër ndaj zhvillimeve të fundit politike, duke akuzuar kreun e BDI-së, Ali Ahmeti, për “manipulim politik, korrupsion dhe pazare të fshehta me pushtetin” në përpjekje për të shpëtuar karrierën e tij politike.

Në një deklaratë për media, VLEN shprehet se “koha e Ahmetit ka mbaruar dhe shqiptarët nuk janë më të gatshëm të mashtrohen nga premtime boshe”. Sipas tyre, Ali Ahmeti dhe partia e tij, BDI, janë në fazën e fundit të rrugëtimit politik, pas dy dekadash që – sipas koalicionit opozitar – janë karakterizuar nga “kapja e shtetit, shantazhet dhe shërbimet e errëta të Soravisë”.

“Pushteti i Ahmetit është ndërtuar mbi kërcënim, frikë dhe manipulim, e sot ai po shembet nën peshën e vet”, thuhet në reagimin e VLEN-it, duke nënvizuar se përpjekjet aktuale të liderit të BDI-së janë vetëm manovra të fundit për të shmangur llogaridhënien.

Deklarata e VLEN-it përfshin edhe një koment të ashpër ndaj Arben Taravarit, i cili kohët e fundit u largua nga ky koalicion, për t’iu bashkuar një kursi tjetër politik. Sipas VLEN, Taravari është bërë “mjet ndihmës në duart e një politike të dëshpëruar” dhe nuk përfaqëson më idealin e ndryshimit.

“Taravari ka zgjedhur të bëhet pjesë e këtij plani, por nuk është as vendimmarrës, as qendror – është vetëm një mjet i hedhur në tavolinën e një politike të dëshpëruar”, theksohet në deklaratë.

Koalicioni u bën thirrje të gjithë aktivistëve, simpatizantëve dhe votuesve të zhgënjyer të Aleancës për Shqiptarët (ASH) që të bashkohen me VLEN-in, duke theksuar se kjo betejë nuk ka të bëjë me poste, por me të ardhmen e popullit shqiptar në Maqedoninë e Veriut.

“Ndryshimi është tashmë në lëvizje dhe nuk ka kthim prapa. As skenarët e vjetër, as pazaret e fshehta nuk do ta ndalin dot vullnetin e qytetarëve për dinjitet, drejtësi dhe përfaqësim të ndershëm”, përfundon deklarata e Koalicionit VLEN./Almakpress