Një ngjarje tronditëse është regjistruar në qytetin e Ohrit, ku një 33-vjeçar është arrestuar nga policia nën dyshimin se ka rrëmbyer tre anëtarë të një familjeje dhe ka kërkuar para për lirimin e tyre. Ngjarja ka ndodhur në orët e para të mëngjesit të 18 majit, ndërsa policia ka ndërhyrë në kohë për të ndaluar autorin.

Sipas njoftimit zyrtar të SPB Ohër, “më 18.05.2025, në orën 00:50, në bulevardin ‘Turistiçka’ në Ohër, është ndaluar A.D. (33) nga Ohri, i cili dyshohet për veprën penale ‘rrëmbim personi’, e dënueshme sipas nenit 141 të Kodit Penal.”

I dyshuari, gjatë një bisede telefonike me Xh.H.D. (36), po ashtu nga Ohri, ka kërkuar dhe marrë para në këmbim të lirimit të gruas së tij, vajzës së mitur dhe gjyshes së tij – të gjithë të rrëmbyer nga A.D., sipas hetimeve fillestare.

“SPB Ohër, duke ndjekur udhëzimet e prokurorit publik, po ndërmerr masa për zbardhjen e plotë të incidentit, pas së cilës do të paraqitet një kallëzim përkatës,” thuhet më tej në deklaratën e policisë.

Policia nuk ka dhënë më shumë detaje mbi motivet e rrëmbimit apo gjendjen shëndetësore të viktimave, por theksohet se hetimet janë në vijim dhe se do të ndërmerren të gjitha veprimet ligjore për këtë rast serioz.

Ngjarja ka shkaktuar shqetësim të madh në komunitetin lokal, ndërsa autoritetet bëjnë thirrje për qetësi dhe bashkëpunim me hetuesit për çdo informacion të mundshëm lidhur me rastin./Almakpress