Një aksident trafiku ka ndodhur mbrëmjen e djeshme në Shkup, ku një motoçiklist ka mbetur i lënduar rëndë si pasojë e përplasjes me një automjet.

Sipas njoftimit të Ministrisë së Punëve të Brendshme (MPB), më 19 maj 2025, rreth orës 19:20, në kryqëzimin ndërmjet bulevardit “Brigada Maqedono-Kosovare”, bulevardit “Sllovenia” dhe bulevardit “Bosnja dhe Hercegovina” në Shkup, ka ndodhur një aksident trafiku mes një veture “Volkswagen” me targa të Shkupit, e drejtuar nga I.K. (29) nga Shkupi, dhe një motoçiklete “Honda”, gjithashtu me targa të Shkupit, që drejtohej nga M.F. (18), po ashtu nga Shkupi.

Si pasojë e përplasjes, motoçiklisti ka pësuar lëndime të rënda trupore dhe është dërguar për trajtim mjekësor në Spitalin e Përgjithshëm të Qytetit “8 Shtatori”, ku edhe është konstatuar gjendja e tij.

“Një ekip policor nga SPB Shkup ka dalë menjëherë në vendin e ngjarjes dhe ka kryer hetimet përkatëse,” thuhet në njoftimin e MPB-së.

Hetimet për zbardhjen e plotë të rrethanave të aksidentit janë në vijim./Almakpress