Kryetari i Aleancës për Shqiptarët (ASH), Arben Taravari, ka pranuar se premtimi për ndryshim në vitin 2024 nuk është përmbushur siç ishte parashikuar. Gjatë një takimi të mbajtur për të zgjedhur shefin e shtabit zgjedhor të partisë, Taravari ka theksuar se qytetarët nuk ndihen më mirë se më parë, përkundrazi, shumë prej tyre mendojnë se situata ka shkuar drejt përkeqësimit.

“Në vitin 2024 thamë që do e sjellim ndryshimin, por tash nuk mund të themi me krenari që kemi sjellur ndryshim. Nëse shkoni në ndonjë institucion si në doganë, spitale etj, dhe pyesni: A jeni më mirë tani apo para se të vinim ne? Të gjithë do të thonë se përpara ishim më mirë se sa jemi tash”, deklaroi Taravari.

Deklarata e tij vjen në një kohë kur Aleanca për Shqiptarët po përgatitet për zgjedhje të reja dhe po përballet me sfida të shumta në terren, përfshirë edhe pakënaqësitë e qytetarëve lidhur me performancën institucionale. Taravari u shpreh se është e nevojshme një analizë e thellë e gabimeve të bëra dhe një qasje më serioze ndaj pritshmërive të elektoratit./Almakpress