Ministri i ri i Shëndetësisë në Maqedoninë e Veriut pritet të votohet në Kuvend më 12 qershor, megjithatë po bëhen përpjekje që kjo të ndodhë edhe më herët. Lajmin e konfirmoi kryeministri Hristijan Mickoski, i cili tha se janë propozuar dy data alternative për këtë proces: 5 dhe 9 qershor.

“Zgjedhja e ministrit të ri të Shëndetësisë do të jetë në rendin e ditës në seancën e planifikuar për më 12 qershor,” deklaroi Mickoski për mediat. “Fatkeqësisht, sot është një ditë e tillë, kështu që nuk mund të vihet papritur në rendin e ditës. Po përpiqemi të arrijmë disi sukses para 12 qershorit. Nëse ia dalim, janë dhënë dy data si opsion në qershor – 5 dhe 9, por të shohim nëse Kuvendi arrin të organizohet dhe të caktojë seancë,” shtoi ai.

Kandidati për ministër të ri të Shëndetësisë është Azir Aliu, ish-ministër i Shoqërisë së Informacionit dhe Administratës. Ai vjen nga radhët e Aleancës për Shqiptarët, e cila vazhdon të jetë pjesë e koalicionit “VLEN”, pas largimit të Arben Taravarit nga posti dhe kalimit të tij në opozitë më 15 maj.

Mickoski sqaroi se vendimi për emërimin e Aliut është marrë javën e kaluar dhe kërkesa për miratimin e tij është dorëzuar në Kuvend të premten. Në të njëjtën seancë, sipas kryeministrit, në rend dite do të jenë edhe emërimet për zëvendësministrat përkatës./Almakpress