Zëvendëskryeministri i Parë, ministër i Mjedisit Jetësor dhe kandidat për kryetar të Komunës së Çairit, Izet Mexhiti, priti në Shkup tenorin kosovar me famë botërore, Ramë Lahaj, me të cilin zhvilloi një takim miqësor në Çarshinë e Vjetër.

Pas takimit, Mexhiti njoftoi në rrjetet sociale për iniciativën e re, një mega-projekt në sferën e kulturës, i cili do të rikthejë Çairin dhe Shkupin në qendër të hartës kulturore shqiptare.

Kryeqyteti do të mirëpresë Festivalin Kombëtar të Kulturës Shqiptare “Porta e Kulturës“, një manifestim gjithëpërfshirës që do të bashkojë muzikën, teatrin, filmin, letërsinë dhe artin pamor në një skenë të vetme.

Mexhiti ia prezantoi idenë e këtij festivali tenorit të njohur, ku u ndanë vizione të përbashkëta.

Sipas tij, “Porta e Kulturës“ do të shndërrohet në një traditë të re, duke promovuar artistët shqiptarë dhe duke lidhur gjeneratat përmes artit dhe krijimtarisë.