Aleanca për Shqiptarët ka shpallur mbështetjen e plotë për protestën e 13 dhjetorit në Sheshin “Skënderbeu” në Shkup, duke bërë thirrje për pjesëmarrje masive në mbrojtje të, siç e quajnë ata, “luftës së pastër për çlirimin e Kosovës” dhe drejtuesve të UÇK-së që “padrejtësisht mbahen në burg”. Në reagimin e partisë thuhet se “çdo njollë dhe akuzë ndaj tyre është tentim për të njëllosur luftën më të pastër dhe më të drejtë që mban mend historia e luftërave të kombeve për liri”.

Aleanca u bën thirrje anëtarëve, simpatizantëve dhe gjithë shqiptarëve pa dallime politike që të bashkohen në protestë për të ngritur zërin “për drejtësi dhe liri”. Partia thekson se kjo çështje është më shumë se një debat politik, duke e cilësuar atë si një përgjegjësi kolektive: “Kjo duhet të jetë kauzë e çdo shqiptari… kjo nuk është një betejë individuale e as politike, por një betejë kombëtare që na tangon të gjithë”.

Në deklaratë nënvizohet gjithashtu se ngritja e zërit është “obligim moral” për të mbrojtur “dinjitetin e një pjesë të lavdishme të historisë sonë”.

Deklarata mbyllet me nënshkrimin e kryetarit të Aleancës për Shqiptarët, Ziadin Sela. / Almakpress