Një aksident i rëndë trafiku me pasoja fatale ka ndodhur sot rreth orës 07:40 në kilometrin e 26-të të autostradës “Ibrahim Rugova”. Në aksident janë përfshirë një kamion me targa vendore dhe një veturë me targa të huaja.

Si pasojë e përplasjes, drejtuesja e veturës ka humbur jetën, ndërsa drejtuesi i kamionit ka pësuar lëndime trupore. Ekipi mjekësor që ka dalë në vendngjarje ka konstatuar vdekjen e viktimës.

Në vendin e ngjarjes kanë intervenuar njësitë policore, zjarrfikësit dhe ekipet tjera relevante, të cilat janë duke hetuar rrethanat e aksidentit.

“Sot, rreth orës 07:40, në autostradën “Ibrahim Rugova” në kilometrin e 26-të ka ndodhur një aksident trafiku me pasoja fatale. Në këtë aksident kanë qenë të përfshira një mjet i rëndë transportues-kamion, me targa vendore dhe nje veturë me targa të huaja. Si pasojë e aksidentit drejtuesja e veturës ka humbur jetën, ndërsa drejtuesi i kamionit ka pësuar lendime. Vdekjen e viktimës e ka konstatuar ekipi mjekësor në vendin e ngjarjes. Në vendin e ngjajres përveç njësive policore të cilat janë duke u marrë me rastin, kanë dalë edhe njësia e zjarrfikësve dhe njësitë relevante. Policia e Kosovës, apelon për respektim të rregullave të trafikut dhe të kenë kujdes të shtuar gjatë pjesëmarrjes në trafik”, ka konfirmuar zëdhënësi i Policisë, Baki Kelani për KosovaPress.

Policia e Kosovës ka apeluar për respektim të rregullave të trafikut dhe kujdes të shtuar gjatë ngasjes, me qëllim të parandalimit të rasteve të tilla tragjike.