Kryetari i Bashkimit Demokratik për Integrim, Ali Ahmeti, ka reaguar përmes një postimi në faqen e tij zyrtare në Facebook, ku ka riafirmuar mbështetjen e palëkundur ndaj Shteteve të Bashkuara të Amerikës si aleat strategjik. Ahmeti thekson se kjo mbështetje “ka qenë dhe mbetet zgjedhje e qartë dhe e drejtë”, duke vënë në pah rëndësinë e partneritetit me SHBA-në në mbrojtje të lirisë, demokracisë dhe sigurisë globale. Në reagimin e tij, ai shpreh mbështetje të drejtpërdrejtë për lidershipin e Presidentit Donald Trump dhe angazhimin amerikan kundër regjimeve autoritare dhe strukturave kriminale, duke nënvizuar se “qëndrimi i fortë ndaj narkoliderëve dhe krimit të organizuar është mbrojtje jo vetëm për Amerikën, por për paqen dhe stabilitetin ndërkombëtar”. Ahmeti thekson se popujt meritojnë të jetojnë të lirë, me institucione demokratike dhe sundim të ligjit, ndërsa rikujton se historia ka dëshmuar se “kur Amerika udhëheq me vendosmëri, liria fiton”. Duke iu referuar edhe përvojës historike, ai nënvizon se rrugëtimi drejt lirisë është dëshmi e drejtpërdrejtë e mbështetjes amerikane, ndërsa shton se partneriteti transatlantik forcohet kur mbështetet në vlera të përbashkëta dhe qëndrim të bashkuar përballë tiranisë. Reagimin e tij, Ahmeti e përmbyll me mesazhin: “Kur Amerika qëndron e fortë, qëndrojmë të fortë së bashku.”/Almakpress