Presidentja e Republikës së Kosovës, Vjosa Osmani, ka pritur sot në takim Admiralin amerikan George M. Wikoff, komandantin e Forcave të Përbashkëta të NATO-s në Napoli. Lajmi është bërë i ditur nga vetë presidentja Osmani përmes një postimi në faqen e saj zyrtare në Facebook.

Gjatë takimit, Osmani e ka uruar Admiralin Wikoff për detyrën e re, duke ritheksuar mirënjohjen e Kosovës për angazhimin e vazhdueshëm të NATO-s ndër vite. “E mirëprita sot në takim Admiralin amerikan George M. Wikoff, komandantin e Forcave të Përbashkëta të NATO-s në Napoli, të cilin e urova për detyrën e re dhe ritheksova mirënjohjen tonë ndaj NATO-s në këto 26 vite të angazhimit të tyre në Kosovë”, ka shkruar Osmani.

Presidentja ka theksuar se Kosova vazhdon të jetë një faktor stabiliteti në rajon, duke nënvizuar se “Kosova mbetet një partner i besueshëm dhe i përkushtuar për siguri dhe paqe”.