Shtëpia e Bardhë ka njoftuar zhvillimin e takimit të parë të nivelit të lartë të “Bordit të Paqes”, i cili do të mbahet më 19 shkurt në Washington, sipas raportimeve të portalit Axios. Ky samit do të shërbejë jo vetëm si një takim diplomatik, por edhe si një konferencë donatorësh për mbledhjen e fondeve për rindërtimin e Gazës. Një ditë më parë, më 18 shkurt, Presidenti Donald Trump do të presë kryeministrin izraelit Benjamin Netanyahu për të koordinuar hapat e fundit para aktivizimit të Bordit.

Në këtë strukturë të re marrin pjesë 26 vende, përfshirë Shqipërinë dhe Kosovën, të cilat kanë konfirmuar praninë e tyre. Parlamenti i Shqipërisë miratoi më 28 janar pjesëmarrjen e kryeministrit me një konsensus të rrallë prej 110 votash. Bordi ka mandat për të krijuar një forcë ndërkombëtare stabilizimi në Gaza dhe për të mbikëqyrur armëpushimin e brishtë mes Izraelit dhe Hamasit.

Ky është takimi i parë zyrtar pas samitit themelues të Davosit më 20 janar 2026. Drejtuar nga Trump, Bordi synon të marrë qeverisjen e përkohshme të Gazës dhe ka ambicie për të zgjidhur konflikte globale, duke ngjallur skepticizëm tek aleatët perëndimorë për minimin e rolit të Kombeve të Bashkuara.