Përmes një postimi në rrjetin social Facebook, Elisa Spiropali ka reaguar në mbështetje të studentëve shqiptarë në Maqedoninë e Veriut, të cilët kërkojnë që provimin e jurisprudencës ta japin në gjuhën shqipe. Ajo ka përgëzuar angazhimin qytetar të studentëve dhe mënyrën demokratike me të cilën kanë artikuluar kërkesën e tyre, duke theksuar se kjo e drejtë është e garantuar nga Kushtetuta dhe legjislacioni në fuqi.

Spiropali ka vlerësuar gjithashtu gatishmërinë e institucioneve të Maqedonisë së Veriut, në veçanti të Kryeministrit Hristijan Mickoski dhe Zëvendëskryeministrit Arben Saliu, për ta trajtuar çështjen me seriozitet dhe në përputhje me kuadrin kushtetues dhe ligjor të vendit.

Sipas saj, dialogu, zgjidhjet institucionale dhe respektimi i të drejtave janë rruga më e sigurt për forcimin e besimit dhe standardeve demokratike në shoqëri.