Në Gjykatën Speciale në Hagë, të hënën fillojnë deklaratat përmbyllëse në procesin gjyqësor ndaj ish-presidentit të Kosovës, Hashim Thaçi, ish-kryeparlamentarëve Kadri Veseli dhe Jakup Krasniqi, si dhe ish-deputetit Rexhep Selimi.

Të katërtit akuzohen për krime lufte dhe krime kundër njerëzimit, akuza të cilat i kanë hedhur poshtë duke u deklaruar të pafajshëm. Sipas aktakuzës, krimet e pretenduara janë kryer nga marsi i vitit 1998 deri në shtator të po atij viti, në disa lokacione në Kosovë dhe në veri të Shqipërisë.

Pas përfundimit të deklaratave përmbyllëse, çështja do t’i kalojë trupit gjykues. Gjykatësit kanë afat prej tre muajsh për të marrë vendim, me mundësi zgjatjeje të këtij afati nëse vlerësohet e nevojshme.