Lidhur me procesin gjyqësor ndaj ish-drejtuesve të Ushtrisë Çlirimtare të Kosovës dhe mënyrën se si po interpretohet lufta për çlirimin e Kosovës, ka reaguar edhe një nga drejtuesit e Lëvizjes “Arbëria”, Bekim Fazliu.

Në një prononcim të publikuar në rrjetet e tij sociale, Fazliu e ka cilësuar luftën e UÇK-së si një akt thelbësor të drejtësisë historike, duke e konsideruar procesin aktual gjyqësor si thellësisht të padrejtë.

“Lufta e Ushtrisë Çlirimtare të Kosovës është një ndër aktet më të fuqishme të drejtësisë. Gjykimi i saj sot përbën akt padrejtësie, turp dhe maskarallëk juridik ndërkombëtar, që duhet të marrë fund!”, ka shkruar Fazliu.

Sipas tij, lufta çlirimtare e Kosovës nuk ishte vetëm në shërbim të shqiptarëve, por kontribuoi në ndërtimin e paqes dhe stabilitetit për të gjithë qytetarët e Kosovës, përfshirë edhe komunitetin serb.

“Lufta e Kosovës nuk solli paqe dhe drejtësi vetëm për shqiptarët e Kosovës, por për të gjithë qytetarët e saj. Këtë paqe dhe drejtësi sot e gëzojnë edhe serbët e Kosovës”, thekson ai, duke shtuar se këto të drejta sot gëzohen në nivel më të lartë sesa nga shqiptarët në Maqedoninë e Veriut dhe madje edhe nga vetë serbët në Serbi.

Në deklaratën e tij, Fazliu vendos theks të veçantë edhe te ndikimi i vazhdueshëm i regjimeve autoritare në Serbi dhe roli i Rusisë në Ballkan, duke e parë Kosovën si faktor kyç të stabilitetit rajonal.

“Kosova e lirë dhe e fuqishme është garanci për paqe në Ballkan. Ajo mbetet shpresa për liri, drejtësi dhe stabilitet në të gjithë rajonin”, përfundon Fazliu.

Deklarata e tij interpretohet si një qëndrim i fortë politik dhe moral në mbrojtje të luftës çlirimtare të UÇK-së dhe një kritikë e drejtpërdrejtë ndaj drejtësisë ndërkombëtare, për të cilën ai vlerëson se po rrezikon të rishkruajë historinë e një lufte që solli liri dhe paqe.