Në vazhdën e reagimeve të ashpra ndaj procesit gjyqësor në Gjykatën Speciale dhe mënyrës se si po trajtohet lufta çlirimtare e Kosovës, ka reaguar edhe kryetarja e Komunës së Preshevës, Ardita Sinani.

Duke iu referuar propozimit për dënime prej 45 vjetësh burg për secilin nga ish-krerët e Ushtrisë Çlirimtare të Kosovës, Sinani e ka cilësuar këtë qasje si thellësisht problematike dhe shqetësuese për ndjenjën e drejtësisë.

“Në Hagë u propozua dënimi prej 45 vjetësh burg për secilin nga ish-krerët e UÇK-së. Një qasje që lë shumë pyetje të hapura dhe cenon ndjenjën e drejtësisë”, ka shkruar ajo.

Sipas Sinanit, drejtësia nuk mund të ndërtohet mbi shtrembërimin e fakteve historike dhe as mbi qasje kolektive që rrezikojnë revizionizmin dhe negacionizmin historik.

“Drejtësia duhet të jetë e paanshme dhe individuale, pa shtrembërim të së vërtetës historike dhe pa rrëshqitur në revizionizëm apo negacionizëm”, thekson ajo.

Kryetarja e Preshevës rikujton se lufta e UÇK-së ishte një luftë çlirimtare dhe antikoloniale, ndërsa agresioni buronte nga regjimi i Millosheviqit, një e vërtetë që, sipas saj, nuk mund të vihet në bankën e të akuzuarve.

“Lufta e UÇK-së ishte e drejtë, e pastër, çlirimtare dhe antikoloniale, ndërsa agresori ishte regjimi i Millosheviqit. Kjo është një e vërtetë që nuk mund të gjykohet e as të rishkruhet”, shprehet Sinani.

Në përmbyllje, ajo thekson se e vërteta historike nuk mund të dënohet, por duhet të mbrohet si themel i drejtësisë dhe paqes së qëndrueshme.

“E vërteta nuk dënohet. Ajo mbrohet”, përfundon deklarata e saj.

Reagimi i Ardita Sinanit interpretohet si një qëndrim i fortë politik dhe moral kundër deformimit të luftës së Kosovës dhe si mbështetje e qartë për narrativën historike të një lufte çlirimtare që solli liri dhe stabilitet në rajon.