Kuvendi Qendror i Lëvizjes Besa, me shumicë votash, ka miratuar vendimin për shkarkimin e Kryesisë Qendrore të partisë, në kuadër të procesit të nisur për bashkimin e koalicionit VLEN në një subjekt të vetëm politik.

Sipas njoftimit, Kuvendi vlerësoi se ky hap është i domosdoshëm për t’i hapur rrugë strukturimit të VLEN-it, duke u bazuar në moratoriumin e aktiviteteve partiake të subjekteve që përbëjnë këtë koalicion.

Me këtë rast, Kuvendi autorizoi kryetarin e Lëvizjes Besa, Bilall Kasami, që të vijojë bisedimet për të ardhmen e VLEN-it. Ai mori mbështetje për bashkimin në një subjekt të vetëm, me theks në një zgjidhje që respekton parimin e drejtësisë dhe reflekton vullnetin e votuesve të VLEN-it dhe të shqiptarëve në përgjithësi.

Në mbledhje u diskutua edhe puna e funksionarëve të Lëvizjes Besa në Qeveri. Kuvendarët mbështetën qëndrimin e kryetarit Kasami se partia ka kapacitet për të realizuar më shumë sesa është arritur deri më tani.

Analiza e punës së funksionarëve do të vazhdojë në ditët në vijim, ndërsa konstatimet pritet të reflektohen në rikonstruimin e ardhshëm të Qeverisë.

Lëvizja Besa theksoi se postet qeveritare i konsideron si mjet për të ofruar shërbim sa më efikas ndaj qytetarëve, veçanërisht ndaj shqiptarëve, duke nënvizuar se vendimet e ardhshme do të udhëhiqen nga ky parim.