Në prag të shënimit të 18-vjetorit të Pavarësisë së Kosovës, Kryeministri i Kosovës, Albin Kurti, ka pritur në një takim zyrtar homologun e tij nga Shqipëria, Edi Rama.

Gjatë takimit, Kurti theksoi rëndësinë e thellimit të bashkëpunimit bilateral dhe zgjerimit të marrëveshjeve ekzistuese mes dy vendeve.

“Mirëprita Kryeministrin e Shqipërisë, Edi Rama. Diskutuam për marrëveshjet bilaterale që kemi dhe fushat se ku mund t’i shtojmë ato, për mundësitë e reja dhe si t’i shfrytëzojmë sa më mirë, si dhe për sfidat e përbashkëta dhe mënyrat për t’i tejkaluar ato sa më lehtë,” u shpreh Kurti.

Ai shtoi se mandatet e ripërtërira të të dy qeverive duhet të shfrytëzohen për të intensifikuar bashkëpunimin ndërshtetëror në funksion të qytetarëve.

“Me mandatet tona të ripërtërira, përmes bashkëpunimit ndërqeveritar dhe ndërshtetëror, le t’u shërbejmë edhe më tej e më shumë qytetarëve në të dy republikat dhe kombit tonë mbarë,” deklaroi ai.

Takimi vjen në një moment simbolik për shtetin e Kosovës dhe rikonfirmon angazhimin për koordinim më të ngushtë mes Prishtinës dhe Tiranës në përballje me sfidat e përbashkëta.