Qeveria do të vazhdojë me politikë të qartë për financa publike të qëndrueshme dhe mbrojtje të standardit jetësor të qytetarëve. Kështu deklaroi kryeministri Hristijan Mickoski në konferencën vjetore “Formalizimi i ekonomisë joformale: Përmes bashkëpunimit drejt suksesit”.

Në fjalimin e tij, Mickoski theksoi se lufta kundër ekonomisë gri nuk është aksion i përkohshëm, por proces i vazhdueshëm dhe sistematik.

“Do të jemi të fortë dhe të drejtë – si ndaj atyre që shmangin detyrimet, ashtu edhe ndaj atyre që përpiqen të përfitojnë nga krizat. Detyrimi ynë është i qartë: ekonomi me rregulla, treg me ligje, shtet me dinjitet”, deklaroi ai.

Sipas tij, ekonomia joformale përfaqëson humbje të drejtpërdrejtë për buxhetin e shtetit dhe pengesë për rritjen e pagave, përmirësimin e shërbimeve shëndetësore, modernizimin e arsimit dhe sigurinë e pensioneve. Ai nënvizoi se qëllimi i Qeverisë është që ekonomia formale të bëhet më e lehtë, më e sigurt dhe më fitimprurëse se ajo joformale.

Në të njëjtën konferencë, ministrja e Financave, Gordana Dimitrieska Koçoska, bëri të ditur se me Planin e rishikuar të veprimit 2026–2027 synohet ulja e ekonomisë joformale nga 28,9% e BPV-së deri në fund të vitit 2027.

Ajo theksoi rëndësinë e përfshirjes aktive të të gjitha institucioneve relevante, si dhe bashkëpunimin me komunitetin e biznesit, sindikatat dhe sektorin akademik. Në këtë drejtim, gjatë konferencës u nënshkrua edhe Deklarata për partneritet dhe veprim, si hap konkret drejt trajtimit të koordinuar të ekonomisë gri.

Mesazhi qendror i konferencës ishte i qartë: formalizimi i ekonomisë nuk arrihet vetëm përmes inspektimeve, por përmes reformave të thella, bashkëpunimit institucional dhe rritjes së besimit në sistem.