Mëngjesin e sotëm janë regjistruar sërish alarme për bomba në disa shkolla fillore dhe të mesme në Tetovë, raportoi TV21.

Menjëherë pas njoftimeve, ekipet e Policisë kanë dalë në terren dhe, sipas protokolleve të sigurisë, nxënësit dhe stafi arsimor kanë lëshuar objektet shkollore deri në përfundimin e kontrolleve.

Kujtojmë se alarme të ngjashme për mjete shpërthyese pati edhe gjatë ditës së djeshme në shkolla në Shkup dhe Tetovë, të cilat pas verifikimeve rezultuan të jenë denoncime të rreme.

Autoritetet vijojnë hetimet për identifikimin e autorëve të këtyre kërcënimeve, ndërsa bëjnë thirrje për qetësi dhe bashkëpunim nga qytetarët.