Këngëtari shqiptar Ermal Meta është rikthyer në skenën e Festival di Sanremo, duke sjellë këtë vit këngën “Stella stellina”, një projekt me mesazh të fortë human.

Meta, i cili fitoi edicionin e vitit 2018 në duet me Fabrizio Moro me këngën Non mi avete fatto niente dhe më pas u rendit i pesti në Eurovision Song Contest, rikthehet me një krijim që ndërthur ritme të shpejta, ngjyra latine dhe elementë ballkanikë, duke reflektuar rrënjët e tij artistike dhe një dimension pothuajse koral.

“Stella stellina” i kushtohet një vajze të vogël të v'rarë në Gaza gjatë një sulmi, një histori që përcillet përmes figurës së një burri që mban në duar kukullën e saj. Nën energjinë ritmike të këngës fshihet një nga rrëfimet më të dhimbshme të këtij edicioni, duke e kthyer performancën e Metës në një moment reflektimi dhe emocioni të thellë për publikun.

Me këtë rikthim, artisti dëshmon edhe një herë aftësinë për të bashkuar muzikën pop me mesazhe sociale, duke e shndërruar skenën e Sanremos në një hapësirë ndjeshmërie dhe ndërgjegjësimi.