Në rrugën “Metodija Mitevski” në Komunën e Çairit kanë përfunduar punimet për asfaltimin e plotë të segmentit rrugor, pas rregullimit dhe standardizimit paraprak të trotuareve, duke shënuar një hap të rëndësishëm në përmirësimin e infrastrukturës lokale.

Ky investim synon rritjen e sigurisë për këmbësorët dhe vozitësit, si dhe përmirësimin e kushteve të qarkullimit në këtë zonë të frekuentuar. Me trotuare të rregulluara sipas standardeve dhe me shtresë të re asfalti, rruga tashmë ofron lëvizje më të sigurt dhe më komode për banorët.

Punimet do të vijojnë me vendosjen e ndriçimit publik si fazë përfundimtare e projektit, duke e bërë hapësirën më funksionale dhe më të sigurt gjatë orëve të mbrëmjes.

Autoritetet komunale paralajmërojnë se me të njëjtin intensitet do të vazhdohet edhe me asfaltimin e rrugëve të tjera të planifikuara në kuadër të projekteve infrastrukturore për Komunën e Çairit.