Deputeti i BDI-së, Arbër Ademi, ka reaguar ashpër ndaj deklaratës së Zëvendëskryeministrit të Parë, Bekim Sali, lidhur me raportet mes Shqipërisë dhe Maqedonisë së Veriut dhe dimensionin kombëtar të shqiptarëve.

Reagimi i Ademit vjen pasi Sali theksoi se Shqipëria dhe Maqedonia e Veriut janë dy shtete fqinje, anëtare të NATO dhe me aspiratë të përbashkët për anëtarësim në Bashkimi Evropian, duke nënvizuar karakterin ndërshtetëror të marrëdhënieve mes tyre.

Në kundërpërgjigjen e tij, Ademi thekson se marrëdhëniet ndërshtetërore nuk duhet të ngatërrohen me identitetin kombëtar të shqiptarëve. Sipas tij, shqiptarët në Maqedoninë e Veriut janë pjesë e të njëjtit komb që jeton në Shqipëri, Kosovë dhe në të gjitha hapësirat ku ka shqiptarë, duke shtuar se përkatësia kombëtare nuk mund të relativizohet nga kufijtë administrativë.

Ai ka theksuar se shqiptarët janë një komb i vetëm dhe nuk mund të trajtohen si popuj të ndryshëm, pavarësisht organizimit shtetëror apo rrethanave politike. Reagimi i tij ka nxitur debat në opinionin publik, duke rikthyer në qendër të vëmendjes raportin mes identitetit kombëtar dhe marrëdhënieve institucionale në rajon.

Debati pritet të vazhdojë, ndërsa çështja e identitetit dhe pozicionimit politik të shqiptarëve në Maqedoninë e Veriut mbetet temë e ndjeshme dhe me peshë në diskursin publik.