Presidenti i Shtetet e Bashkuara të Amerikës, Donald Trump, ka deklaruar se SHBA-të do të hakmerren për vdekjen e ushtarëve amerikanë gjatë operacioneve ushtarake kundër Iranit, duke paralajmëruar një reagim të ashpër ndaj Teheranit.

Në një video të publikuar në platformën Truth Social, Trump u shpreh se Uashingtoni do t’i japë “goditjen më ndëshkuese” regjimit iranian, duke e cilësuar ndërhyrjen si pjesë të një operacioni të domosdoshëm për sigurinë kombëtare.

“Ne po ndërmarrim një operacion masiv, jo vetëm për të siguruar sigurinë për kohën dhe vendin tonë, por edhe për fëmijët tanë dhe fëmijët e tyre”, deklaroi Trump, duke e përshkruar këtë si “detyrën dhe barrën e një populli të lirë”.

Presidenti amerikan theksoi se veprimet e SHBA-së janë “të drejta dhe të nevojshme”, me synimin që qytetarët amerikanë të mos përballen kurrë me një regjim që ai e quajti “terrorist radikal dhe të etur për gjak”, të armatosur me armë bërthamore.

Deklarata e tij vjen në një moment tensionesh të larta mes dy vendeve, ndërsa përplasjet dhe retorika e ashpër mes Uashingtonit dhe Teheranit kanë rritur shqetësimet për një përshkallëzim të mëtejshëm në rajonin e Lindjes së Mesme.

Analistët ndërkombëtarë paralajmërojnë se çdo veprim ushtarak i zgjeruar mund të ketë pasoja të gjera për stabilitetin rajonal dhe sigurinë globale, në një kohë kur situata mbetet e brishtë dhe e paparashikueshme.