Sekretari i Përgjithshëm i NATO-s, Mark Rutte, zhvilloi sot një vizitë zyrtare në Shkup, në kuadër të agjendës së tij rajonale, ku u prit nga krerët më të lartë të shtetit.

Gjatë qëndrimit në kryeqytet, Rutte realizoi takim me presidenten Gordana Siljanovska-Davkova, me kryeministrin Hristijan Mickoski, si dhe vizitoi Kuvendin, ku ishte paraparë të mbante një fjalim para deputetëve.

Megjithatë, vizita në Parlament u shoqërua me një situatë të papritur. Deputetët e partisë opozitare “E Majta”, e cila përfaqësohet me gjashtë mandate në Kuvend, shpalosën një banderolë të madhe përpara podiumit me mesazhin “NATO vret për përfitim”.

Ky veprim u konsiderua si një akt proteste ndaj pranisë së kreut të Aleancës Veriatlantike në vend, duke e kthyer fjalimin e tij në një moment me tension politik.

Kjo është vizita e parë e Mark Rutte në Shkup në cilësinë e Sekretarit të Përgjithshëm të NATO-s. Ai kishte qëndruar më herët në kryeqytet në nëntor të vitit 2021, atëherë në funksionin e Kryeministrit të Holandës.

Vizita e tij zhvillohet në një periudhë me sfida të shumta për sigurinë rajonale dhe rolin e NATO-s në Ballkanin Perëndimor, ndërsa mesazhet politike brenda vendit dëshmojnë për polarizimin e vazhdueshëm rreth çështjeve të sigurisë dhe orientimit euroatlantik.