Organizatorët e ceremonisë së 98 të Academy Awards po shqyrtojnë skenarë alternativë për zhvillimin e eventit, pas përshkallëzimit të situatës në Lindjen e Mesme dhe zhvillimeve të fundit në Iran. Sipas burimeve të cituara nga Page Six, mes opsioneve që po analizohen është edhe mundësia e anulimit të tapetit të kuq, në mënyrë që ceremonia të mos perceptohet si një festim demonstrativ në një moment të ndjeshëm ndërkombëtar.

I njëjti burim bën të ditur se tapeti i kuq ishte planifikuar të dekorohej me panje japoneze, simbol i paqes dhe jetëgjatësisë, por organizatorët po vlerësojnë nëse një simbolikë e tillë është e përshtatshme në klimën aktuale gjeopolitike.

Megjithatë, përfaqësues të industrisë së filmit në Hollywood kanë deklaruar se deri më tani nuk ka ndryshime konkrete në organizim, ndërsa Akademia po analizon me kujdes çdo detaj që lidhet me imazhin publik të ceremonisë.

Situata konsiderohet edhe më delikate për faktin se këtë vit në garë janë tre kandidatë iranianë, mes tyre regjisori Jafar Panahi me filmin It Was Just an Accident, si dhe Sara Khaki dhe Mohammadreza Eini me dokumentarin Cutting Through Rocks. Brenda industrisë ekziston shqetësimi se tapeti i kuq mund të shndërrohet në një “fushë të minuar”, pasi yjet e kinemasë mund të përballen me pyetje mbi zhvillimet ndërkombëtare.