Në 28-vjetorin e Epopesë së Ushtrisë Çlirimtare të Kosovës, një nga momentet më të rëndësishme të historisë së re shqiptare, ka reaguar edhe Bekim Fazliu nga Lëvizja Arbëria në Maqedoninë e Veriut.

Përmes një mesazhi përkujtimor, Fazliu theksoi rëndësinë historike dhe simbolike të sakrificës së familjes Jashari, duke e cilësuar Prekazin si simbol të qëndresës dhe të betimit kombëtar.

“Prekazi nuk është thjesht një vend në hartën e trojeve shqiptare. Jasharajt nuk janë vetëm një familje në historinë tonë. Sakrifica e tyre sublime nuk ishte veç një akt trimërie i çastit. Prekazi është betim. Jasharajt janë themeli i qëndresës sonë. Flijimi i tyre është amanet, simbol i gjallë dhe përjetësi e skalitur në ndërgjegjen e kombit shqiptar”, u shpreh Fazliu.

Epopeja e UÇK-së dhe sakrifica e familjes Jashari në Prekaz mbeten një nga ngjarjet më domethënëse të rezistencës shqiptare dhe një simbol i përhershëm i lirisë së Kosovës.