Çështja e përzgjedhjes së liderit të koalicionit VLEN vazhdon të mbetet e hapur. Njëri nga drejtuesit e këtij koalicioni dhe kryetari i Komunës së Çairit, Izet Mexhiti, deklaroi se ende nuk ka ndonjë zhvillim të ri në lidhje me këtë temë.

I pyetur nëse vizita në Prekaz ka të bëjë me finalizimin e çështjes së liderit të VLEN-it, Mexhiti sqaroi se qëllimi i vizitës është krejtësisht tjetër. Ai theksoi se atje shkojnë për të bërë homazhe te varrezat e familjes Jashari.

Mexhiti shtoi se diskutimet brenda koalicionit vazhdojnë dhe se publiku do të informohet sapo të ketë një vendim. Ai u shpreh se, sa i përket VLEN-it, po punohet dhe nuk ka diçka jashtë asaj që është thënë deri më tani, ndërsa në momentin e duhur opinioni do të njoftohet.

Sipas tij, procesi nuk lidhet vetëm me zgjedhjen e një lideri, por edhe me drejtimin politik të koalicionit. Mexhiti theksoi se nuk është vetëm çështja e liderit, por po flitet për ideologjinë, programin, platformën dhe mënyrën më të mirë se si do të funksionojë VLEN-i në të ardhmen.