Tema e migrantëve ka nxitur përplasje të reja politike mes LSDM-së dhe VMRO-DPMNE-së. Përfaqësuesit e dy partive kanë shprehur qëndrime të ndryshme lidhur me pretendimet për pranimin e migrantëve në vend.

Nga LSDM thonë se debati për terminologjinë është i panevojshëm dhe se thelbi i çështjes mbetet i njëjtë, pavarësisht se si quhen personat që mund të vijnë në vend. “Edhe Mickoski edhe VMRO-DPMNE mund t’i quajnë si të duan këta njerëz, migrantë, azilantë, refugjatë ose punonjës ekonomik. Thelbi është i njëjtë, ndryshon vetëm termi për të manipuluar me të vërtetën”, deklaroi Andrej Zhernovski nga LSDM.

Nga ana tjetër, VMRO-DPMNE mohon kategorikisht se ekziston ndonjë marrëveshje për strehimin e migrantëve në Maqedoninë e Veriut. “Nuk ka marrëveshje, nuk ka bisedime, nuk ka qendra migrantësh dhe nuk ka migrantë. Kishte vetëm veprime destruktive nga ana e LSDM-së dhe përsëritje të të njëjtës gënjeshtër”, tha Mile Lefkov nga VMRO-DPMNE.

Debati u rikthye në vëmendje pas deklaratës së ambasadorit britanik në vend, Methju Llauson, i cili në një intervistë tha se nuk ekziston marrëveshje mes Mbretërisë së Bashkuar dhe Maqedonisë së Veriut për pranimin e migrantëve në këmbim të mbështetjes financiare.