Kryeministri i Shqipërisë, Edi Rama, në një intervistë për të përditshmen turke “Türkiye Today”, ka folur për zhvillimet rajonale, marrëdhëniet me Turqinë dhe tensionet me Serbinë, duke theksuar mbështetjen e palëkundur të Tiranës për Kosovën.

Rama u shpreh se marrëdhëniet mes Shqipërisë dhe Turqisë janë të forta dhe strategjike, por sipas tij ndikimi ekonomik i Ankarasë në Ballkan nuk përputhet gjithmonë me ndikimin e saj politik. Ai theksoi gjithashtu marrëdhënien e tij me presidentin turk Recep Tayyip Erdoğan, duke thënë se, “kam një marrëdhënie të shkëlqyer me presidentin Erdogan, ai është shumë i drejtpërdrejtë, po është po dhe jo është jo”.

Në intervistë, Rama komentoi edhe deklaratat e presidentit të Serbisë, Aleksandar Vučić, i cili ka akuzuar Shqipërinë, Kosovën dhe Kroacinë për krijimin e një aleance ushtarake kundër Serbisë. Kryeministri shqiptar i hodhi poshtë këto pretendime duke theksuar se ato burojnë nga frika dhe tensionet rreth çështjes së Kosovës.

Ai deklaroi se, “presidenti Vuçiç ka makthin e tij, që është Kosova”, duke shtuar se realiteti i pavarësisë së Kosovës është i pakthyeshëm.

Rama theksoi gjithashtu se çdo kërcënim ndaj Kosovës prek drejtpërdrejt edhe Shqipërinë. Sipas tij, “nëse Kosova është nën një kërcënim ekzistencial, atëherë është edhe Shqipëria”.