Pavarësisht rritjes së dytë të çmimeve të karburanteve, Qeveria ende nuk ka prezantuar masa konkrete për lehtësimin e barrës financiare të qytetarëve. Nga ekzekutivi bëjnë të ditur se po monitorojnë situatën dhe po shqyrtojnë mundësinë e uljes së TVSH-së nga 18% në 10%, por pa dhënë një afat të saktë për zbatimin e kësaj mase.

“Qeveria po monitoron në mënyrë aktive situatën me çmimet e karburanteve dhe në periudhën e ardhshme ndër alternativat në shqyrtim është ulja e TVSH-së nga 18% në 10%, me qëllim mbrojtjen e standardit të jetesës së qytetarëve”, thuhet në reagimin zyrtar.

Nga ana tjetër, opozita ka ashpërsuar kritikat. Kryetari i LSDM-së, Venko Filipçe, deklaroi se Qeveria nuk ka ndërmarrë asnjë hap konkret për përballimin e krizës dhe paralajmëroi dorëzimin e një pakete ligjore në Kuvend, që përfshin uljen e TVSH-së për karburantet në 5%, uljen e akcizës, heqjen e TVSH-së për produktet bazë ushqimore dhe përgjysmimin e tarifave rrugore.

Kritika të ngjashme vijnë edhe nga BDI, ku theksohet se mungesa e masave mund të çojë në rritje shtesë të çmimeve. “Nëse masat nuk zbatohen urgjentisht, çmimet mund të rriten me më shumë se 10%, duke rënduar seriozisht buxhetet familjare”, deklaroi Albana Mustafa nga kjo parti, duke kërkuar edhe përgjegjësi institucionale për menaxhimin e krizës.

Ndërkohë, çmimet e derivateve të naftës kanë shënuar rritje të re, ku benzina varion nga 86.5 deri në 88.5 denarë për litër, ndërsa nafta ka arritur në 92 denarë për litër.