Ministri i Punëve të Jashtme dhe Tregtisë së Jashtme, Timčo Mucunski, do të zhvillojë një vizitë pune dyditore në Bruksel, ku pritet të realizojë një sërë takimesh me përfaqësues të lartë të institucioneve evropiane.

Sipas njoftimit zyrtar, ai do të takohet me eurokomisioneren për zgjerim, Marta Kos, si dhe me nënkryetaren ekzekutive të Komisionit Evropian, Roxana Mînzatu. Po ashtu, së bashku me ministrin Cvetan Tripunovski, do të zhvillojë takim edhe me Elisabeth Werner, drejtoreshë e përgjithshme për bujqësi dhe zhvillim rural në Komisionin Evropian.

Gjatë qëndrimit në Bruksel, janë planifikuar edhe takime me deputetë të Parlamenti Evropian, si dhe një brifing me përfaqësues të vendeve anëtare në Grupin Punues për Zgjerim pranë Këshilli i Bashkimit Evropian.

Në kuadër të vizitës, ministri do të marrë pjesë edhe në tryezën e rrumbullakët “A path for European enlargement”, organizuar nga Friends of Europe.

Në njoftim thuhet se fokusi i kësaj vizite do të jetë avancimi i procesit të integrimit evropian të vendit, dinamika e negociatave për anëtarësim, si dhe forcimi i bashkëpunimit me institucionet e Bashkimit Evropian në fusha të ndryshme me interes të përbashkët.