Presidenti i Serbisë, Aleksandar Vuçiç, deklaroi se vendi i tij është më i përgatitur se më parë për të përballuar sfidat e sigurisë, duke theksuar se Serbia ka rritur kapacitetet e saj mbrojtëse.

Në një fjalim para qytetarëve, ai tha se “nuk ka më qëllime të pakapërcyeshme për ne dhe askush nuk mund të mendojë se do të sulmojë Serbinë pa u ndëshkuar”.

Vuçiç foli edhe për presionet ndërkombëtare lidhur me Kosovën, duke deklaruar se “të huajt ma kanë thënë këtë mijëra herë, do ta fitosh Çmimin Nobel, thjesht njihe Kosovën si vend të pavarur”.

Ai shtoi se Serbia nuk ka qëllime agresive ndaj fqinjëve, duke theksuar se “ne nuk do të sulmojmë askënd, as kroatët dhe as shqiptarët, por do ta mbrojmë vendin tonë”.

Deklaratat e tij vijnë në një klimë të ndjeshme politike në rajon, ku çështjet e sigurisë dhe marrëdhëniet ndërkombëtare vazhdojnë të mbeten në fokus.