Komuna e Çair ka shpërndarë 13 vendime për punësim të përhershëm për mësues që deri më tani ishin të angazhuar me kontrata mbi vepër, duke shënuar një hap drejt stabilizimit të statusit të tyre profesional.

Kryetari i komunës, Izet Mexhiti, përmes një njoftimi publik bëri të ditur se ky proces nuk do të ndalet, por do të vazhdojë edhe në të ardhmen me synimin që të gjithë të angazhuarit të përfitojnë status të rregullt pune.

“Sot, Komuna e Çairit ka dhënë 13 vendime për punësim të përhershëm për 13 mësues, të cilët më parë ishin të angazhuar me kontrata mbi vepër. Ky proces do të vazhdojë edhe në të ardhmen, që secili i angazhuar me kontratë mbi vepër të ketë mundësinë të pajiset me vendim për punësim të përhershëm”, thuhet në deklaratë.

Ai theksoi se prioritet mbetet krijimi i vendeve të sigurta të punës dhe ndërtimi i një administrate funksionale dhe të konsoliduar.